Kenya: Umupolisi ukomeye yiciwe mu rukiko

Amakuru avuga ko uyu mupolisi witwa Kipchirchir Kipruto yarashe Monica Kivuti; umucamanza mukuru wo mu rukiko rwa Makadara, nyuma gato yuko afashe icyemezo mu rubanza rwaregwagamo umugore we.

Uyu mupolisi mukuru, CIP Kipchirchir Kipruto, yarakajwe n'icyemezo cy'urukiko cyo gusesa gufungurwa by'agateganyo kw'umugore we nyuma yo kutitaba urukiko ndetse akananirwa no gutanga ibisobanuro binyuze urukiko.

CIP Kipchirchir Kipruto wari ukuriye stasiyo ya polisi yo mu mujyi wa Londiani, mu burengerazuba bwa Kenya, yahise asohora imbunda arasa umucamanza, aramukomeretsa.

Abandi bapolisi bakuru bari bari mu rukiko bahise basubiza ako kanya, maze umwe muri bo aramusa aramwica.

Rubinyujije mu itangazo, Urwego rw'ubucamanza rwa Kenya rwavuze ko uwo mucamanza yasheshe kurekurwa by'agateganyo hatanzwe ingwate ku muntu ushinjwa kandi utaritabye urukiko.

Rigira riti: “Ako kanya iki cyemezo kigitangazwa, umuntu yarashe umucamanza amukomeretsa mu mayunguyungu. Uwarashe ni umupolisi mukuru washakanye n'ucyekwa.”

Raporo ya polisi igaragaza uko byagenze, ivuga ko abandi bapolisi bakuru batatu bakomerekeye muri uko kurasana.

BBC ivuga ko uwo mucamanza n'abapolisi bakuru bakomeretse barimo kuvurirwa mu bitaro.

Polisi ya Kenya yavuze ko uwo mupolisi mukuru yari ari mu rukiko ku mpamvu zitazwi kandi iperereza rikomeje kugira ngo hamenyekane icyateje uko kurasa.

Ibyo byabereye imbere mu rukiko, byatumye Abanya-Kenya benshi bagwa mu kantu,  cyane ko akenshi Polisi yagiye ishinjwa kugira uruhare mu bwicanyi butemewe n'amategeko, ariko nta bwicanyi nk'ubwo bwari bwarigeze butangazwa ko bwabereye imbere mu rukiko.

Icyakora urwego rw'ubucamanza rwavuze ko ruzavugurura ingamba z'umutekano ndetse rwijeje umutekano abakozi bo mu bucamanza n'abandi bagana inkiko.

Umwanditsi mukuru w'ubucamanza Winfridah Mokaya, yagize ati: “Nk'umuryango w'ubucamanza, twifurije mugenzi wacu gukira vuba. Tunihanganishije umuryango w'umupolisi mukuru wapfiriye muri ibi byabaye bibabaje.”