EU yahanishije Hungary ihazabu ya €200m kubera umugambi wayo ku basaba ubuhungiro

Uru rukiko rwatangaje ko buri munsi ruzagenda rwongeraho miliyoni imwe y’ama-euro kugeza ubwo kizahindura politike yayo  ku basaba ubuhunzi.

Urukiko rwa EU rwamenyesheje ko ubutegetsi bwa Budapest bwanyuranije n’ingingo yarwo yo mu 2020 yemeza ko bwarenze ku itegeko ry’Ubumwe bw’Uburayi mu guhatira abasaba ubuhungiro kwambuka berekeza Belgrade cyangwa Kyiv muri Ukraine gusabayo impapuro zibemerera kujya muri Hungary.

Mu butumwa yanyujije ku rukuta rwe rwa X [rwahoze ari Twitter], Viktor Orbán; minisitiri w’intebe wa Hungary, yavuze ko ayo mande baciwe kubera ‘kurinda imbibe z’Ubumwe bw’Ubulayi’ ari amande ‘adashobora kwihanganirwa’.

Yongereyeho ko ‘bisa nk’aho abinjira mu gihugu batabifitiye uburenganzira ‘bafitiye akamaro inzego z’abahagarariye Ubumwe bw’Uburayi ziri Bruxelles, gusumbya abanyaturaye b’ibihugu bigize umuryango w’ubumwe bw’Uburayi bahagarariye.

Hungary yafashe umurongo ukomeye ku bimukira baturuka hanze y’umugabane w’Uburayi, kuva aho abarenga miliyoni binjiriye muri ico gihugu mu 2015, aho abenshi babaga bahunze intambara yo muri Syria.

Leta ya Hungary yashinze uruzitiro igerageza guhagarika benshi bashaka gutambuka imbibe z’icyo gihugu. Amategeko y’Umuryango w’ubumwe bw’Uburayi avuga ko umuntu wese uhunze itotezwa mu gihugu cye, afite uburenganzira bwo gusaba kurengerwa mu mahanga, kandi adashobora kwirukanwa asubizwa mu gihugu cye, mu gihe hari impungenge zikomeye zigaragaza ko ashobora kwicwa cyangwa gukorerwa iyicarubozo.

Mu itangazo ryagiye ahagaragara ku wa kane, ku ya 13 Kamena (06) 2024, urukiko rwa rwamenyesheje ko Hungary yirengagije nkana gukwirikiza politike ya EU ku basaba ubuhunzi, kandi ko kunanirwa kuyishira mu bikorwa bigize icyaha kitari cyaboneka kandi gikomeye mu mategeko y’uyu muryango.

Uru rukiko ruvuga ko kwanga kwisunga politike y’Ubumwe bw’Uburayi harimo kuba Hungary yarafunze mu buryo budakurikije amategeko abasabaga ubuhungiro mu mahanga, ntiyubahirize uburenganzira bwabo bwo kuguma muri Hungary kugeza barangije kuburana kuri ubwo busabe bw’ubuhunzi bari bimwe. 

Uru rukiko rwa EU rutangaza ko kuba Hungary yarananiwe kubahiriza amategeko y’Ubumwe bw’Uburayi bishyira umutwaro ku bindi bihugu by’uwo muryango kandi bigasubiza inyuma urugendo rwo gusenyera umugozi umwe.

Politike nsha y’Ubumwe bw’Ubulayi yo kwihutisha gusubiza abasaba ubuhunzi, itegeka ibihugu binyamuryango guhitamo gufata abimukira babarurwa mu bihumbi bagwiriye mu bihugu bashikiramo nk’Ubutaliyani, Grece, na Espagne, cyangwa bikongera amafaranga ashyirwa mu kigega cyangwa ubundi buryo bukoreshwa muri iyo gahunda.

Hungary yahisemo kudafata n’umwimukira n’umwe winjiye mu buryo bunyuranyije n’amategeko, ititayeho ku ngaruka izo arizo zose.

Hungary yiteguye kandi kuzagerwaho mu kuyobora EU kuwa 01 Nyakanga (07) 2024, umwanya ibihugu binyamuryango bigenda bisimburanwaho.