Kinyarwanda
English
Mali: Babiri mu bashyigikiye ubutegetsi bwa gisirikare bararegwa guhamagarira urugomo
Abagize Ihuriro ry’inzibacyuho (CNT) barashinjwa kwibasira abashyigikiye demokarasi muri Mali. Biton Mamari Coulibaly na Moulaye Keita, babiri mu bagize CNT bashyigikiye bikomeye ubutegetsi bw’inzibacyuho, barezwe ku wa 21 Gicurasi (05) 2025 mu rukiko ruburanisha ibyaha bikorerwa kuri murandasi ( internet).
Ibi byakurikiye amashusho bashyize hanze mu ntangiriro z'uku kwezi, bashishikariza gukorera urugomo n’ihohoterwa ku bantu bagaragaza ibitekerezo bitandukanye n’iby’abari ku butegetsi.
Abo banyapolitiki bashinjwa gutuka rubanda, gusebanya no gutanga ibyifuzo by’ubwicanyi, nk’uko byatangajwe na bamwe mu barwanya ubutegetsi bwa gisirikare. Ikirego cyatanzwe ku rwego rw’igihugu, mu rwego rwo gusaba ko abo bagabo bafatwa nk’abandi bose bagiye batangaza amagambo atemewe n’amategeko hifashishijwe internet.
Urukiko rwasabwe kwerekana ko ubutabera budakora ku ruhande rumwe gusa, cyane ko urwo rwego rumaze kwamamara kubera guhana abakomeje kunenga ubutegetsi buriho muri Mali.
Ibi bibaye nyuma yaho Leta y'inzibacyuho iseshe amashyaka ya politike. Ndetse ku wa mbere, bamwe mu banyapolitike basi bayoboye amwe muri ayo mashyaka yaseshwe batanze ibirego mu nkiko 6 zo muri Bamako bashinja Leta iriho kurenga ku itegeko nshinga, bakabuza abaturage ibirimo uburenganzira bwo kwishyira hamwe, kugira uruhare mu miyoborere myiza n'ibindi.
