Uganda: Igisilikari cyahakanye gufasha abarwanyi ba M23

Ingabo za Uganda zirahakana gufasha inyeshyamba za M23 mu rugamba zihanganyemo na FARDC, WAZALENDO, SADC mu burasirazuba bwa RD Congo. Zivuga ko ibikubiye muri raporo y'inzobere z'Umuryango w'Abibumbye (ONU) atari ukuri.

Ikinyamakuru Daily Monitor cyo muri Uganda cyarangaje ko Umuvugizi wa UPDF, Brigadiye Jenerali Felix Kulayigye, yagize ati:"Raporo irabogamye. Ntishingiye ku bushakashatsi. Yifitemo guhengama. [Inzobere zayikoze] Ntibagize uburere bwo mu by'ubwenge ['intellectual discipline'] bwo gushaka uruhande rw'inkuru rwacu cyangwa ngo bakoreshe ubutabera karemano."

Brig Gen Kulayigye yavuze ko UPDF iheruka kugaba ingabo mu ntara ya Kivu ya Ruguru mu kwezi k'Ukuboza (12) mu 2023, mu rwego rw'umutwe w'ingabo z'akarere k'Afurika y'uburasirazuba.

Iruhande rw'ibi kandi, raporo y'inzobere za ONU inashinja iki gihugu gufasha ihuriro rya 'Alliance Fleuve Congo' rikorana n'inyeshyamba za M23.

Iyo raporo yanavuze ko nubwo abakuru ba M23 bafatiwe ibihano na ONU, bagikomeje gukora ingendo banyuze ku kibuga mpuzamahanga cy'indege cya Entebbe cyo muri Uganda.

Gusa iyi raporo ntirashyikirizwa ONU mu buryo bweruye.

Muri 2021, nibwo Uganda yongeye kohereza abasirikare bayo muri DR Congo, aho ibihugu byombi bikorana ibikorwa bya gisirikare byo kurwanya umutwe w'inyeshyamba za ADF w'inyeshyamba zikomoka muri Uganda  ariko zigakorera mu burasirazuba bwa DR Congo.