Urubanza Kabila arengwamo gufatanya na M23 n'abacanshuro, rwasubitswe

Ku wa Gatanu, taliki ya 25 Nyakanga (07) 2025, nibwo uru rubanza rwatangiye kuburanishwa ariko Kabila adahari. Abahagarariye Leta muri uru rubanza bavuga ko bagerageje kenshi kumugezaho impapuro zimuhamagaza mu rubanza ariko akaba yabuze.

Ibi byatumye urubanza ruburanishwa adahari, nk’uko biteganwa n'amategeko.

Ubwo  ibyaha Kabila aregwa byari bimaze gusomerwa mu rukiko, abunganira Repubulikaya RD Congo  basabye ko urubanza rusubikwa kugeza ku wa 31 Nyakanga (07) 2025, bavuga ko inyandiko ziri muri dosiye ari nyinshi kandi ziremereye, bityo hakenewe umwanya wo kuzikurikirana no kuzigaragariza urukiko neza.

Ubushinjacyaha bwa gisirikare bwari bwamaze gutangaza ko Kabila akurikiranweho ibyaha bikomeye birimo: kwica abantu 31, kugerageza kwica abandi 21, gufata ku ngufu Umujyi wa Goma kuva ku wa 27 Mutarama (01) 2025, no kugira uruhare mu byaha by’intambara n’ihohoterwa ryakorewe muri Sud-Kivu binyuze ku mufatanyabikorwa we Corneille NaNangaa.

Akurikiranweho ibindi byaha birimo  gushyigikira iterabwoba, nk’uko byagaragaye mu kiganiro yagiranye n’igitangazamakuru Sunday Times cyo mu Bwongereza, hamwe no kugira uruhare mu itangizwa ry’umutwe w’inyeshyamba AFC/M23, ushinjwa gufashwa n’ingabo z’u Rwanda (RDF),  ndetse kuri iyi nshuro hongeweho n’abacanshuro.

Minisitiri w’ubutabera w’agateganyo, Samuel Mbemba, yatangaje ko n'ubwo Kabila atagaragaye mu rubanza bitazabuza ko ruzakomeza:

Ati: “Ubutabera ntibuganirwaho. Bukora mu gihe cyabwo, butitaye kuri gahunda za politiki."

Isubikwa ry’uru rubanza ryatumye hibazwa byinshi, cyane ko ku nshuro ya mbere Kabila yashinjwe gukorana na M23 n'abacanshuro, ibizwi cyane kuri Leta ya RD Congo.

@radiookapi