Kinyarwanda
English
Uwahoze ari Perezida yasabwe guha passport Polisi nyuma yo kugerageza guhirika ubutegetsi.
Jair Bolsonaro wahoze ari Perezida wa Bresil yasabwe guha Polisi y’iki gihugu urupapuro rwe rw’inzira [Passport] nyuma y’uko ku wa kane yibasiwe n’igipolisi akekwaho kuba umwe mu bagerageje guhirika ubutegetsi mu mvururu zabaye ku ya 8 Mutarama (01) 2023, nk’uko byatangajwe n’abamwunganira mu mategeko.
Abinyujije ku rubuga rwa X[ rwahoze ari Twitter], Fabio Wajngarten wunganira Jair Bolsonario ndetse wahoze hafi ye akiri Perezida muri 2019-2022, yavuze ko “mu rwego rwo kubahiriza ibyemezo byafashwe uyu munsi, Bolsonario arashyikiriza Passport ye ubutegetsi.”
Polisi ya Bresil yatangaje iki cyemezo binyuze mu itangazo rigenewe abanyamakuru. Igipolisi cyavuze ko cyatangiye igikorwa byaguye basaka abantu 33 ndetse banatanga impapuro 4 zo guta muri yombi [abantu kitatangaje umubare wabo] mu rwego rwo gukora iperereza ku mutwe w’abagizi ba nabi wagize uruhare mu gushaka guhirika ubutegetsi.
Polisi ivuga ko ababikoze bari bafite inyungu za politiki ku gukomeza kuba ku butegetsi kwa perezida wari uriho, Jair Bolsonario.
Jair Bolsonaro wahoze ari Perezida yatsinzwe mu matora yabaye mu kwezi k’Ukwakira (10) 2022, ubwo yageragezaga guhatanira indi manda, aho yarahanganye na Luiz Inacio Lula da Silva, waje gutorwa nka Perezida ari nawe wamusimbuye.
Icyumweru kimwe nyuma y’irahira rya Perezida Lula, ku ya 8 Mutarama (01) 2023, ibihumbi n’ibihumbi by’abanyabresil bashyigikiye Bolsonario basahuye inyubako za leta muri Brasilia, mu gihe cy’imyigaragambyo isa n’igitero cyagabwe kuri Capitol muri Amerika, mu myaka ibiri yari ishize.
Ibitangazamakuru byo muri Bresil bitangaza ko abajeneral bane bari mu basatswe ku wa kane, barimo nka Walter Braga Netto, wahoze ari Minisitiri w’ingabo akaba n'umukandida wungirije wa perezida ku ruhande rwa Jair Bolsonaro, na Augusto Heleno wahoze ari Minisitiri w’inama y’umutekano ishinzwe kurinda itegeko nshinga.
Mu cyumweru gishize, umwe mu bahungu ba Jair Bolsonaro yibasiwe n’ikindi gikorwa cya polisi, mu rwego rwo gukora iperereza ku butasi butemewe na guverinoma y’uwahoze ari perezida [Ise umubyara].
